ڈی آئی خان ٹارگٹ کلنگ اور خودکش حملے میں 8 افراد شہید اور 30 زخمی

0aebd710-c2c8-418a-b508-0e26205433c0.jpg

ڈیرہ اسماعیل خان :ڈیرہ اسماعیل خان میں پولیس اہلکاروں کی ٹارگٹ کلنگ کے بعد سول ہسپتال ٹراما سنٹر میں خود کش دھماکہ کے نتیجے میں 4 پولیس اہلکاروں اور کمسن بچی سمیت 8 افراد شہید جبکہ 8 پولیس اہلکاروں اور کمسن بچے سمیت 30 افراد زخمی ہوگئے ہیں، بچے سمیت متعدد شدید زخمی افراد کو ابتدائی طبی امداد کے بعد آرمی ہیلی کاپٹر میں پشاور اور اسلام آباد شفٹ کردیا گیا۔

تفصیلات کے مطابق گزشتہ صبح تھانہ ڈیرہ ٹائون کی حدود میں کوٹلہ سیداں پولیس چیک پوسٹ پر نامعلوم موٹر سائیکل سواروں کی فائرنگ سے چیک پوسٹ پر تعینات ایف آر پی پولیس کے دو اہلکارایل ایچ سی جہانگیر سکنہ کورائی اور کانسٹیبل انعام اللہ سکنہ نون نواب موقع پر ہی شہید ہوگئے۔ جن کو ریسکیو 1122کی ایمبولینس کے ذریعے ڈسٹرکٹ ہیڈ کوارٹر ٹیچنگ ہسپتال ڈیرہ منتقل کیا گیا.

اس دوران دیگر پولیس افسران و اہلکاروں کے علاوہ شہید اہلکاروں کے رشتہ داران او دیگر عام مریض بھی موجود تھے کہ اس اثناء میں ہسپتال کے ٹراما سنٹر کے باہر مبینہ خود کش بمبار نے خود کو دھماکے سے اڑا دیا جس سے ہر طرف تباہی پھیل گئی۔

دھماکے کے نتیجے میں ایلیٹ پولیس فورس کے دو پولیس اہلکار ہدایت اللہ اور خلیل سمیت پانچ سالہ مریم ولد مشتاق، ضمیر حسین ولد محمد نذیر اور ایک نامعلوم شخص شہید ہوگیا جبکہ پولیس اہلکاران اسلام اللہ، نصیب اللہ، کاشف سجیل، فضل الرحیم اور ڈی ایس بی اہلکار عابد خٹک سمیت نعیم قریشی، محمد عدیل، حیات، سہیل، حمزہ، محمد آصف، مشتاق، عظیم، فضل الرحمن اور محمد سلیمان سمیت30افراد زخمی ہوگئے جنہیں فوری طور پر ریسکیو1122، سرکاری اور نجی ایمبولینسز کی مدد سے سی ایم ایچ ہسپتال منتقل کیا گیا جہاں متعدد افراد کی حالت تشویشناک بتائی جاتی ہے۔

واقع کی اطلاع کے بعد سٹیشن کمانڈر ڈیرہ بریگیڈئیر رائو عمران سرتاج، ریجنل پولیس آفیسر کیپٹن ریٹائرڈ فیروز شاہ، ڈی پی او سلیم ریاض سمیت پولیس و عسکری حکام موقع پر پہنچ گئے اور حالات کا جائزہ لیا۔دھماکہ اتنا شدید تھا کہ اس کی آواز دور دور تک سنی گئی اور دھماکے سے ٹراما سنٹر کی کھڑکیاں اور دروازے ٹوٹ کر دور جاگرے اور ٹراما سنٹر کے باہر کھڑی گاڑیاں اور موٹر سائیکل بھی تباہ ہوگئے۔دھماکے کے بعد علاقہ میں خوف ہراس پھیل گیا اور ہسپتا ل روڈ پرمیڈیکل سٹورز سمیت دیگر دوکانیں بندہوگئیں۔

بم ڈسپوزل ذرائع کے مطابق دھماکے میں 8سے10کلو گرام بارود مواد استعمال کیا گیا۔ ابتدائی اطلاعات کے مطابق خود کش دھماکہ خاتون حملہ آور نے کیا تاہم بعد ازاں خود کش حملہ آور کی باقیات کے جائزہ اور مبینہ طور پر کالعدم تحریک کی جانب سے جاری بیان کی روشنی میں یہ بات سامنے آئی کہ حملہ آور خاتون نہیں بلکہ مرد تھا۔

ادھر ضلعی انتطامیہ کے مطابق شدید زخمی ایک بچے کو آرمی ہیلی کاپٹر کے ذریعے پشاور منتقل کیا جارہا ہے جبکہ دھماکے میں شہید ایلیٹ فورس اہلکاروں کے جسد خاکی بھی پولیس لائن میں نماز جنازہ ادائیگی کے بعد آرمی ہیلی کاپٹر کے ذریعے ان کے آبائی علاقے دیر روانہ کر دئیے گئے۔

جواب دیں

آپ کا ای میل ایڈریس شائع نہیں کیا جائے گا۔

scroll to top