لوئر دير:چیئرمین پیپلز پارٹی بلاول بھٹو زرداری نے وزیراعظم عمران خان کو مخاطب کرتے ہوئے کہا کہ میرے پورے خاندان اور پارٹی کو جیل میں ڈال دو لیکن عوام کے حقوق پر کوئی سمجھوتا نہیں کریں گے۔
خیبر پختونخوا کے ضلع لوئر دیر میں عوامی جلسے سے خطاب کے دوران بلاول بھٹو زرداری کا وزیراعظم کو تنقید کا نشانہ بناتے ہوئے کہنا تھا کہ ہمارا مقابلہ جمہوریت کے لبادے میں چُھپی آمریت سے ہے، سلیکٹڈ وزیراعظم پاکستان میں فاشزم قائم کرنا چاہتا ہے۔
وفاقی حکومت کے ایک نہیں دو نئے پاکستان ہیں! جس میں لاڈلے کی آف شور کمپنی حلال، ن لیگ کی آف شور کمپنی حرام۔ پشاور کا مہنگا ترین نامکمل میڑو حلال، لاہور کی مکمل میڑو حرام۔ بے نامی اکاؤنٹز حرام، مگر بے نامی وزیراعظم حلال@BBhuttoZardari #NayaPakistanNaManzoor
(4/5) pic.twitter.com/I8t9C6phsC— PPP (@MediaCellPPP) July 8, 2019
انہوں نے مزید کہا کہ اقتدار میں آنے سے پہلے عمران کا چہرہ کیا تھا اور آج کیا ہے؟ انصاف کی بات کرنے والے کی سیاست آج انتقام کی سیاست ہے۔
بلاول بھٹو نے کہا کہ یہ 18 ویں ترمیم کو ختم کرنا چاہتے ہیں، صوبوں کے حقوق پر ڈاکا ڈالنا چاہتے ہیں لیکن ہم انہیں عوام کے حقوق چھیننے نہیں دیں گے۔
انہوں نے کہا کہ عمران خان آج ملک کے حالات کو اس نہج پر لے آئے ہیں کہ ان کی حکومت کے پہلے ہی سال لوگ حکومت کے جانے کی دعا کر رہے ہیں۔
وزیراعظم کو مخاطب کرتے ہوئے بلاول بھٹو نے کہا کہ عمران خان سُن لو، مجھے یا میرے خاندان یا پوری پارٹی کو جیل بھیج دو مگر 18 ویں ترمیم اور صوبائی خود مختاری پر کوئی سمجھوتا نہیں ہوگا۔